सुतो राणो सुख भर नींद मेवाड़ी राणा भजन हिंदी लिरिक्स

सुतो राणो सुख भर नींद मेवाड़ी राणा लिरिक्स

सूतो राणो सुख भर नींद ,मेवाड़ी राणा ओ ,

सूतोड़ा राणा ने सपनो आवियो ।

आयो – आयो आळ जंजाळ मेवाड़ी राणा ओ ,

मीरां ने देखी रे भगवां वेश में ।

उठ्यो राणो आळस मरोड़ मेवाड़ी राणा ओ ,

धम – धम करतां महलां उतरयो ।

उठो साथी करसलिया सिणगार मेवाड़ी राणा,

परभाते जाणो म्हाने मेड़ते ॥

सामा मिळ ग्या गायां रा गवाळ मेवाड़ी राणा ओ,

मारगियो बताय दे मीरां रे देश रो ॥

डावी डांडी पुष्कर जी में जाय मेवाड़ी राणा ओ ,

जिमणोड़ी जासी सीधी मेड़ते ॥

सामी मिळ गी पाणी री पणिहार मेवाड़ी राणा,

घर तो बता दे मीरां रे बाप रो ॥

सूरज सामी दूदा जी री पोळ मेवाड़ी राणा ओ ,

केळ झबूके मीरां रे बारणे ॥

सामी मिळ गी साधां री जमात मेवाड़ी राणा ओ

बिच में मेड़तणी आवे नाचती ॥

चढ़गी चढ़गी राणा जी ने रीस मेवाड़ी राणा ओ ,

काढ खढग राणो कोपियो ॥

मीरां हो गई एकण री हजार मेवाड़ी राणा ओ ,

किण – किण मीरां ने राणो मार सी ।

मोड़ो जाग्यो मूरख गिंवार मेवाड़ी राणा ओ ,

पेला लखतो तो सरगां जावतो ॥

गावे गावे मीरां ज्यांरा वैकुण्ठां में वास ओ ,

सुणियां साम्भळिया भव जळ उतरे ।