Kandhal Karni Ri Varta Lyrics: कांधल करणी माता रानी री वार्ता लिखित में

 माँ करणीजी के आशीर्वाद और रावत कांधल जी की करवाल से बीकानेर राज्य की स्थापना।।

म्हे तो राज चारणी सिंवरा देसाणे वाली मात भाई रै,
सिंवरा देसाणे वाली मात भाई रै
कांधल करणी री गावा वार हे वारता रै हां।।

अब राज राठौड़ी सजियो जोधाणो दरबार भाई रै,
सजियो जोधाणो दरबार भाई रै।
काको भतीजो बतलाव, हे बतलावता रै हां।।

जणा राव जोधाजी मुखड़े सूं दियो फरमाय भाई रै,
मुखड़े सूं दियो फरमाय भाई रै,
राज थपावो के जूनी भौम हे भौम में रै हां।।

अब राज राठौड़ी लाग्यो काळजीये रै बोल भाई रै,
लाग्यो काळजीये रै बोल भाई रै,
जोश भरिज्या राठौड़ी राज हे राजवी रै हां।।

हमै हुकुम हुवे तो धरा तो ढबावा दूजी ठोड़ भाई रै,
धरा तो ढबावा दूजी ठोड़ भाई रै,
राज बणावां रै जांगल देस हे देस में रै हां।।

अरे भाई कांधल म्हे तो करी यूँही मजाक भाई रै,
म्हे तो करी यूँही मजाक भाई रै,
इतरा रिसाणा किणविद होव हे होवीया रै हां।।

अब भाई जोधोजी हँस हँस देवो म्हानै सीख भाई रै,
हँस हँस देवो म्हानै सीख भाई रै,
म्हे तो चाल्या रै जूनी भौम, हे भौम में रै हां।

अब कांधल काका लियो भतीजो बीको साथ भाई रै,
लियो भतीजो बीको साथ भाई रै,
आया देसाणे करणी मात हे मात रै हां।।

अब मात भवानी राखो थै सिर पर हाथ बाई हे,
राखो थै सिर पर हाथ बाई हे,
राज ढबास्या जांगल भौम हे भौम में रै हां।।

अब मात भवानी लिया है हिवड़े लगाय भाई रै,
लिया है हिवड़े लगाय भाई रै,
दिन्ही आशीषा माजी मोक हे मोकळी रै हां।।

अब कांधल बीका मनड़ा में धीरज धार भाई रै,
मनड़ा में धीरज धार भाई रै,
राज बणे लो रै जांगल देस हे देस में रै हां।।

अब सांवत सूरो जावो थै चुंड़ासर रै मांय भाई रै,
जावो थै चुंडासर रै मांय भाई रै,
फौज बणावो एक सांव हे सांवठी रै हां।।

करणी किरपा सूं जीत्या है राठौड़ा चवदह कोट भाई रै,
जीत्या राठौडा चवदह कोट भाई रै,
राज बणायो बीकाणों राज हे राजवी रै हां।।

खुद मात भवानी हाथा लगाई गढ़ नींव भाई रै,
हाथा लगाई गढ़ नींव भाई रै,
राज थर्पियो जांगल देस हे देस में रै हां।।

हमै राव बीकाजी गादी लगाई जणा तीन भाई रै,
गादी लगाई जणा तीन भाई रै,
बीदा कांधल संग बणसी राज हे राजवी रै हां।।

जणा रावत कांधल दिन्ही है गादी तो उठाय भाई रै,
दिन्ही है गादी तो उठाय भाई रै,
राजा बणे लो बीको राज हे राजवी रै हां।।

सब भाई भतीजा होसी रै थारा उमराव भाई रै,
होसी रै थारा उमराव भाई रै,
उमराव होसी रै कांधलदेव हे देवजी रै हां।।

कहे मात भवानी म्हारै सूं पलटी मतना जाय भाई रै,
म्हारै सूं पलटी मतना जाय भाई रै,
काका कांधल रो कर्जो मान हे मानणों रै हां।।

इण सूरै कांधल बावन लड़िया युद्ध भौम भाई रै,
बावन लड़िया युद्ध भौम भाई रै,
भीष्म कहवायो राठौड़ी राज हे राजवी रै हां।।

अजय सिकरोड़ी लिखी है शब्दों में पिरोय भाई रै,
लिखी है शब्दों में पिरोय भाई रै,
लीला रतनू तो गा'य सुणा हे सुणायदी रै हां।।

जणा रामसभा में गांवा राठौड़ी वाला गीत भाई रै,
गांवा राठौड़ी वाला गीत भाई रै,
कांधल करणी री गावा वार हे वारता रै हां।।

Singer  : - Leela Ratnu

Lyrics :- Ajay Singh Sikrdoli

जय श्री करणी माताजी, जय श्री रावत कांधलदेव जी राठौड़